Koronavirus: Qırımda bir künde 92 yañı hasta qayd etildi, beş adam öldi

Tünevin Qırımda 92 yañı koronavirus hastası qayd etildi, 7-niñ hastalıq alâmetleri yoq edi. Bunı Qırımnıñ Rusiye başı Sergey Aksönov bildirdi.​

«Hasta olğanlarnıñ umumiy sayısından 64 tibbiy yardım içün muracaat etkende qayd etildi, 27 kişi daa evel qayd etilgen hastalarnen alâqada oldı, bir hasta çetelden keldi», – dep yazıla bildirmede.

Bir künde beş insan vefat etti, bütün müddet devamında ise 1299.

«466 insan (COVID-19) ambulator tedaviylevde buluna, 1552 kişi (COVID-19 ve pnevmoniya) hastahanede yata. Umumen 42370 COVID-19 hastası qayd etildi, 39131 tedaviylendi», – dep haber etile.

Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.