Tünevin Qırımda 102 yañı koronavirus hastası qayd etildi, aynı zamanda 20-niñ hastalıq alâmetleri yoq edi. Bu aqta Qırımnıñ Rusiye yolbaşçısı Sergey Aksönov bildirdi.
«Hasta olğanlarnıñ umumiy sayısından 88 adam tibbiy yardım içün muracaat etkende qayd etildi, 13 daa evel qayd etilgen hastalarnen alâqada oldı, 1 hasta çetelden keldi», – dep yazdı Aksönov.
Onıñ malümatına köre, koronavirus yuqunçı tedqiqlerini yapqan cumhuriyetniñ bütün laboratoriyaları tünevin 1988 insannı teşkerdi.
«Bir künde 7, bütün vaqıt devamında ise 36 534 hasta tedaviylengen», – dedi o.
Rospotrebnadzor, Qırımnıñ yedi regionında koronavirus hastalarınıñ sayısı arta, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.