Qırımda koronavirus yuqunçı sebebinden 2974 insan tibbiy közetüv altında qala.
Bu aqta Qırımnıñ Rusiye sağlıq naziri İgor Çemodanov aprelniñ 5-nde Qırımda koronavirus yuqunçınıñ tarqaluvına qarşı tedbirler meseleleri operativ ştabınıñ toplaşuvında bildirdi.
«Umumen 2974 insan tibbiy közetüv altında qala. 64 insan közetüvge alındı, 129 kişi çıqarıldı. 2886 insan dinamik közetüvde (52 kişi alındı, 123-ü çıqarıldı), 66 insan hastahanede (üç kişi ketirildi, dört kişi çıqarıldı), 22 insan observatorda buluna. Ağır hastalar yoq. Er şey tedaviylev protokolına köre kete», – dep qayd etti Çemodanov.
Qırımda aprelniñ 5-i sabasına qadar eki yañı COVID-19 koronavirus hastası qayd etildi. Al-azırda Qırımda 20 koronavirus yuqunçı hastası qayd etildi, 16-sı ketirildi, dördü yerli ola – eki qorantadan.
Daa evel berilgen malümatqa köre, Qırımda koronavirusnen hastalanğan ve özüni tecrit etüv rejimini bozğan yerli sakinge qarşı ilk cinaiy dava açıldı. Qırımlınıñ advokatı qabaatını inkâr ete ve mahkemege muracaat etmege niyetlene.
Rusiye politsiya hadimleri, özüni tecrit etüv rejimini bozıp, öz maşinasınen plâjğa barğan 37 yaşında Kefe sakinini de observatorğa yolladı.
Aprelniñ 4-nde saba işğal etilgen Qırımda çetel memleketlerinden kelgen 3039 insan tibbiy közetüv altında buluna, olardan 2957-si evde dinamik közetüvde, 67 insan hastahanede qala, 15 insan observatorlarğa tecrit etildi. Rospotrebnadzor malümatına köre, cuma kününe qadar 18 COVID-19 hastası qayd etildi. Aqyarda 5 koronavirus hastası bar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.