Koronavirus Aqyarda: yañı hasta qayd etilmedi, 784 insan közetüv altında buluna

Aqyarda martnıñ 29-nda saba yañı COVID-19 koronavirus yuqunçı hastaları yoq, dep bildirdi şeerniñ Rusiye ükümetiniñ matbuat hızmeti.

Qayd etilgenine köre, martnıñ 29-nda saba yuqunç hastahanesinde 38 insan buluna.

«784 insan közetüv altında buluna. Karantini yañı koronavirus yuqunçına ait alâmetlersiz bitkenler közetüvden çıqarıldı. Diagnozı tasdıqlanğan beş insanğa kerekli yardım kösterile», – dep aytıla haberde.

SEE ALSO: Koronavirus Qırımda: ilk afta

Hatırlatamız, 2020 senesi martnıñ 28-ne qadar Qırım yarımadasında 20 koronavirus hastası qayd etildi: 15 – Qırımda ve 5 – Aqyarda.

Qırımnıñ Rusiye yolbaşçısı Sergey Aksenovnıñ bildirgenine köre, martnıñ 29-ı sabasına qadar Qırımda yañı koronavirus hastaları qayd etilmedi. Qırımda koronavirus yuqunçı sebebinden 2620 insan tibbiy közetüv altında buluna, olardan 2548-i evde dinamik tibbiy közetüv altında qala.

SEE ALSO: Qırımlılarnıñ mektüpleri: Virusnı qıtlıq ve fiyatlarnen urayıq

Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.

Koronavirus: yalan ve propaganda | StopFake News (video)

Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.