Kezlevde Rusiye akimiyeti Ukrayina Ortodoks Kilsesiniñ Krestovozdvijensk tapınağını yoq etmege başladı, dep bildire "Golos Krıma" agentligi.
Beyanatqa köre, şimdilik tapınaqnıñ quplarını alıp taşladılar, kilseniñ yuqarı qısmını yıqıp taşladılar.
2019 senesinden başlap, Rusiye mahkemesiniñ kilseni yıqmağa qarar bergen qararınıñ yerine ketirilmesi sebebinden Kezlevdeki UOK tapınağına basqı yapıldı, dep yaza "Golos Krıma". Qararda qayd etilgenine köre, diniy binanıñ demontajını aynı bu tapınaqnıñ cemiyeti kerçekleştirmek kerek. Qorquzuvlarğa baqmadan, mahkeme qararı yerine ketirilmedi, bunıñ içün Rusiye kontrolindeki Kezlev akimiyeti kene mahkemege muracaat etip, kilseni öz başına yıqmaqnı rica etti.
Daa evel Aqmescitte Rusiye akimiyeti Kinaz Vladimir ve Kiyaz Ölğa ukrayin Katedral kilsesiniñ quplarını yıqtılar. Ukrayina prezidentiniñ Qırım Muhtar Cumhuriyetindeki temsilciligi bunı "işğal etilgen Qırımda ukrain kimliginiñ ve bütün ukrainlerniñ sistematik yoq etilmesiniñ devamı" dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.