Qırımda yañı tintüvler: Rusiye quvetçileri Kezlevde qırımtatar qorantasınıñ evine keldi (video)

İyülniñ 22-nde saba Rusiye quvetçileri Kezlevde qırımtatarlarnıñ evine keldi. «Qırım birdemligi» cemaat birleşmesi faalleriniñ malümatına köre, 57 yaşında Ali İbragimov ve 27 yaşında oğlu Mustafa İbragimovnıñ evinde tintüv keçirildi. Advokat Edem Semedlâyevniñ faallerge bildirgenine köre, Rusiye quvetçileri onı evge kirsetmedi. Advokat bunı «qanun bozuluvı» dep adlandırdı. Evden ğayrı, Rusiye quvetçileri İbragimovlarğa ait tükânda da «tahqiqat tedbirlerini» keçirdi. Ali İbragimovnıñ evinde keçirilgen tintüv yekünlengen soñ eki büyük oğlu Mustafa ve Abdulla İbragimovlarnı Rusiye quvetçileri belli olmağan yerge alıp ketti. Qırım Muhtar Cumhuriyeti ve Aqyar prokuraturası Rusiye quvetçileriniñ Kezlevde 57 yaşında Ali İbragimov ve 27 yaşında oğlu Mustafa İbragimovnıñ evinde keçirgen tintüvleri sebebinden cinaiy tahqiqat başlatıldı, dep bildirdi. Qırımtatar Milliy Meclisiniñ reisi Refat Çubarov Rusiye quvetçileriniñ Kezlevde qırımtatarı Ali İbragimovnıñ evinde keçirgen tintüvini «qırımtatarlarnı ayrı qorquzuv şekli» ve «esas insan aqlarını ihmal etüv» dep adlandırdı. Rusiye quvet müessiseleri vaziyetni açıq şekilde izaatlamay.