Kezlevdeki muvaqqat tutuv izolâtorına yerleştirilgen tevqifli qırımtatarlar yerli sakinlerden ve tuvğanlarından aş ve kerekli şeyler aldılar. Bunı «Qırım birdemligi» cemaat birleşmesi haber etti.
Yerli sakinlerden biri Müslim Müslimovnıñ bireşmege aytıp bergenine köre, adamlar tevqifler aqqında bilgeninen, fallerge kerek olacaq azıq mallarını ve şeylerni deral almağa qarar etkenler.
«Halqımız iç bir vaqıt insannı belâda qaldırmadı. Yardım etmek - bu er bir musulmannıñ borcudır. Böyle vaziyetke pek açuvlımız ve böyle bir şey er birimiznen ola bilecegini añlaymız. Bütün bularnı sovet devrindeki sürgünliknen qıyaslamaq mümkün. Musulmanlar iç bir kimseni aldatmalyar, iç bir kimsege zarar ketirmeyler, tınç yaşaylar, öz Vatanında yaşap, balalarını büyütmege isteyler. Başımızğa nasıl sınavlar kelse bile, er biri keçirip olurmız», — dedi o.
Rusiye quvetçileri noyabrniñ 23-nde Aqmescitteki vaqtınca tutuv izolâtorınıñ binasına 12 kün memuriy apiste qalğan advokat Edem Semedlâyevni qarşılamağa kelgen faallerni tuttı. Umumen 31 insan tutuldı, aralarında qadın ve balalar bar edi. Bundan ğayrı, yanlarında matbuat kartları olğan jurnalistler «alındı».
Noyabrniñ 24-nde Rusiye kontrolindeki Qırım mahkemelerinde qırımtatar faallerine qarşı memuriy protokollar baqıldı. Aqmescitniñ Kiyev rayon mahkemesi vatandaş jurnalisti Vilen Temeryanovnı 14 künge apiske aldı.
Ukraina akimiyeti, aq qorçalayıcılar, çetel elçihaneleri ve missiyaları Rusiyeni Qırımda böyle taqiplerni toqtatmasına çağıra. Rusiye akimiyeti buña qulaq asmay.