Keriçniñ Rusiye memuriyeti yerli sakinlerni kiralıq evler aqqında bildirmelerine çağırdı, çünki Qırımda ev ayırtuvı yasaqlana. Şeer akimiyeti park, skver, cemaat alanları ve meydançıqlarını ziyaret etmek yasaq olğanını bildirdi, dep aytıla memuriyetniñ saytında.
«Bala ve sport meydançıqları, raatlıq yerleri eñ yaqın vaqıtta signal şeritlerinen sarılacaq, böylece keriçliler ve şeer musafirleriniñ ziyareti sıñırlanacaq. Quvetleştirilgen tedbirler koronavirusnıñ şeerde tarqaluvına yol bermemek içün alındı», – dep aytıla haberde.
Qayd etilgenine köre, pandemiya vaqtında oda, daire ve evlerni kirağa bermege yasaqlana, çünki koronavirus yuqunçınıñ tarqaluv telükesi bar – em de künlik kira olsa. Akimiyet, qaidelerge riayet etmegelerni memuriy mesüliyet bekley, dep hatırlata.
Hatırlatamız, Aqyarda yahta ve katerlernen deñiz kezintileri yasaqlandı.
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.