Keriçte Balıq limanı yanında adamlar, suvdan aqay cesedini çıqardı. Adise yerine qurtarıcılar, acele yardım hadimleri ve politsiya vekillerini yolladılar, dep bildire iyül 31-inde Rusiye FVN-niñ Qırım idartesiniñ matbuat hızmeti.
"Yazıq ki, acele yardım hadimleri, suvdan çıqarılğan 1968 yılı doğma aqaynıñ biologik ölümini qayd etti. Ölüm sebepleri muayyen etile", - denile beyanatta.
Hatırlatamız, Yedi Quyu (Leninskiy) rayonınıñ Aqmanay (Kamenskoye) köyünde iyül 29-ında Azaq deñizinde aqıntı, şişirme şiltede yaldağan aqaynı deñizge alıp ketti.
Müessise suvda havfsızlıq qaidelerine uymasınıñ kerekligini hatırlattı.
Böyle adiseler Qırımda sıq-sıq ola. Qırım FVN-niñ malümatına köre, 2018 senesi iyülde Saq rayonında Qara Töbe (Pribrejnoye) qasabasında aqıntı eki balanı şiltede deñizge alıp ketti. 2018 senesi iyülde aqaynı Yalta yalısından 300 metrge alıp ketti.