Keriç köprüniñ ögünde Rusiye ve işğal etilgen Keriç tarafından tıqanıqlıq arta, dep bildire telegram-kanal köprüdeki vaziyet aqqında.
Qayd etilgenine köre, Taman tarafından nevbette 1400 naqliyat maşnası tura ve dört saattan ziyade beklemek kerek.
Keriç tarafından nevbette 298 naqliyat maşinası tura. Bekleme müddeti tahminen bir saat olacaqtır, dep aytıla haberde.
Evel Mariupol şeer yolbaşçısınıñ mesleatçısı Petro Andrüşçenko Rusiye akimiyeti Keriç köpründen keçüv qaidelerini sertleştirdi, dep añlattı. Onıñ aytqanına köre, köpürden tahminen 10 km uzaqlıqta GPSni toqtatıp, REB çalışıp başlay. Bundan da ğayrı, arabalar, sıñırdan keçkende olğanı kibi, teşkerilmek kerek. Eki variant bar: skaner ve el teşkerüvi.
Soñki künleri Keriç köpründe kerçekten de büyük tıqanıqlıqlar bar. Meselâ, iyünniñ 30-nda köprüge 1130 maşna nevbette turğanı aqqında haber etilgen edi. Rusiye akimiyeti bunıñ ne ile alâqası olğanını bildirmedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.