Qırımnıñ Rusiye akimiyeti Keriç köprüne qarşı ücüm aqqında bildirdi

Keriç köprü. Arhiv fotoresimi

İşğal etilgen Qırımnıñ Rusiye akimiyeti Ukrayina Keriç (Qırım) köprüne darbe endirdi, dep bildirdi. Bu aqta yarımadanıñ Rusiye yolbaşçısı Sergey Aksenov Telegram kanalında bildirdi.

"Duşman Qırım köprüne darbe endirdi. Naqliyat areketi künniñ yarısına qadar sıñırlanacaq. Aqibetlerini yoq etmek içün bütün kerekli hızmetler celp etildi, Keriçte operativ ştab açıldı", – dep bildirdi memur noyabrniñ 16-nda saba.

Mesleatçısı Oleg Krüçkov aydavcılardan resmiy malümat kelgenine qadar Krasnodar ülkesi tarafına çıqmamağa rica etti.

Köpürde areket toqtatıldı. Noyabrniñ 16-nda yarımadağa ketken "Tavriya" trenleri keç qala, dep bildirdi "Grand Servis Ekspress" şirketi: 2 saattan 4,5 saatqa qadar keç qalına.

Rusiye Naqliyat nazirligi bildirgenine köre, köpürden reversiv areket başlatıla bile. Şimdi tamir işleri kete. İlk malümatqa köre, yaralanğanlar yoq.

Ukrayina arbiyleri vaziyetni şimdilik izaatlamadı. Qırım.Aqiqat cenk vaziyetinde bu malümatnı teşkerip olamay.