"İzvestiya" Rusiye neşiriniñ jurnalistleri qısqa video levhalarında Rusiyeni işğal etilgen Qırımnen birleştirgen Keriç köprüniñ vaziyetini kösterdi. Videoda infrastruktura obyektiniñ tam zararını añlamaq zor, amma maşina şeritiniñ kemerinde deñişmelerni körmek mümkün.
"Krımskiy veter" Telegram kanalı abunecileriniñ malümatına esaslanıp yazğanına köre, kemer ciddiy seviyede zarar kördi.
"Sol kemer (Qırım tarafından baqsañ) kemerler arasında birinci seviyede darbe alğan sanki. Uzaqtan kemerniñ özünde bir parçaçıq yoq kibi körüne, şu sebepten kemer qıyışlandı", – dep haber ete Telegram kanalı.
"Absolütno nadiyne cerelo" Ukrayina Telegram kanalı Keriç (Qırım) köprüniñ zararlarınen uydu çekimlerini derc etti, amma bunıñ mustaqil delilleri yoq.
Rusiye akimiyeti obyekt zararlarınıñ büyükligini şimdilik aydınlatmay. Hatırlatamız, işğal etilgen Qırımnıñ yolbaşçısı Sergey Aksenov noyabrniñ 16-nda saba köpürge Ukrayina uçucısızları ücüm etti, dep bildirdi. Köpürdeki areket "künniñ yarısına qadar sıñırlanacaq", dep yazdı Aksenov içtimaiy ağlarda.
Ukrayina Mudafaa nazirligi bu malümatnı izaatlamadı. Qırım.Aqiqat cenk vaziyetinde bu malümatnı teşkerip olamay.