Keriç köprü areket toqtatılğanından 9 saat keçken soñ işine başladı, dep haber ete Rusiye kontrolindeki Telegram kanalı. Olarnıñ malümatına köre, köpürde 1380 maşina nevbette tura.
"Taman tarafından 730 naqliyat vastası el kontroli içün nevbette tura. Tahminen üç saat beklemek kerek. Keriç tarafından 650 naqliyat vastası kontrol bekley. Tahminen eki saat beklemek kerek", – dep aytıla haberde.
Hatırlatamız, Keriç köprü gece saat 3:11-den qapalı edi. "Krımskiy veter" Telegram kanalı abunecileriniñ malümatına esaslanıp, saat 3:35-te Keriç boğazı civarında atış eşitile, Keriç köpründe ise ışıqlar söndürildi, dep bildirdi.
Saba Ukrayina Arbiy-deñiz quvetleri bildirgenine köre, aprelniñ 30-na keçer gecesi Keriç boğazında Keriç köprüni qaravullağan eki Rusiye arbiy katerine darbeler endirildi. Video Ukrayina Arbiy-deñiz quvetleriniñ içtimaiy ağlardaki saifelerinde derc etilgen edi.
Keriç köprü Rusiye ise işğal etilgen Qırımnı temin etmek ve Ukrayinağa qarşı cenkni devam ettirmek içün anda arbiy, tehnika ve silâ taşımaq içün strategik ceetten pek müimdir.
Bıltır mart ayınıñ başında Ukrayina Arbiy-deñiz quvetleriniñ komandanı, vitse-admiral Öleksiy Neijpapa The Guardian intervyüsında Ukrayina Rusiyeni işğal etilgen Qırımnen birleştirgen Keriç köprüne üçünci kere darbe endire bile, dep bildirdi. 2022 senesi oktâbrniñ 8-nde Keriç köpründe patlav olğan edi. Rusiye uquq qoruyıcılarınıñ aytqanına köre, köpürde yük maşinası patlatıldı, neticesinde maşina yolunıñ eki qısmı yıqıldı ve demiryol qısmında küçlü yanğın çıqtı. Dört insan elâk oldı. Kreml yolbaşçısı Vladimir Putin Rusiye Federatsiyası Tahqiqat komitetiniñ tahqiqatına esaslanıp, Kerip köpründeki patlavnı "terror ücümi" dep adlandırdı ve Ukrayina mahsus hızmetlerini qabaatladı. Daa bir patlav Keriç köpründe 2023 senesi iyülniñ 17-nde oldı. Rusiye akimiyeti ve uquq qoruyıcıları Ukrayina mahsus hızmetlerini qabaatladı.
Neijpapa Qırım.Aqiqatqa intervyü berip, Keriç köprü Ukrayina arbiyleri içün zor bir nişan ola, amma "yıqılamaycaq iç bir qale yoqtır", dep ayttı. Bunıñnen beraber, Keriç köprü Ukrayina Mudafaa quvetleri içün bir nişan olıp qala, amma "onıñ muvafaqiyetli yeñilmesi içün informatsion sessizlik qalmaq kerek".