Sentâbrniñ 25-nde aqşam ve sentâbrniñ 26-nda gece Rusiye akimiyeti Keriç köpründe areketni eki kere qapattı, Qırımnıñ Telegram kanalları ise Qırımnıñ İslâm Terek rayonı, Keriç ve Ermeni Bazarda patlavlar aqqında bildirgen edi.
Rusiye kontrolindeki Keriç köpründeki vaziyetniñ monitoring kanalınıñ malümatına köre, areket saat 22:48-den 23:21-ge qadar ve 00:30-dan 02:40-qa qadar qapatılğan edi.
Aynı vaqıtta Qırım saifeleri patlavlarğa oşağan sesler aqqında bildirip başladı. «Krımskiy veter» Telegram kanalı Qırımnıñ İslâm Terek rayonında 22:56, 23:11 ve 23:21-de ava mudafaasınıñ işi ve patlavlar aqqıda haber etti. «Krımskiy veter» haberine köre, daa eki patlav İslâm Terek rayonınıñ Oy Quyu (Vladislavovka) köyünde eşitildi. Bundan ğayrı, yarımadanıñ şimali tarafında Ermeni Bazar rayonında saat 23:44-te küçlü bir patlav aqqında haber etildi. Yarı geceden soñ Keriçte eşitilgen eñ az beş patlav aqqında haber keldi.
Rusiye monitoring Telegram kanalları sentâbrniñ 25-nde aqşam ve sentâbrniñ 26-nda gece Qırımnıñ ğarbi, şimali ve şarqında uçucısız ücüminiñ telükesi aqqında bildirdi. Rusiye akimiyeti vaziyetni izaatlamay. Rusiye Federatsiyasınıñ Mudafaa nazirligi sentâbrniñ 26-nda saba Qırımda urıp tüşürilgen 14 dron aqqında esabat berdi, amma anda delil kösterilmedi. Ukrayina arbiyleri ücüm aqqında daa haber etmedi.
Ücüm aqibetleri aqqında şimdilik haber etilmedi. Qırım.Aqiqat muarririyeti malümatnı teşkere ve vaziyetni taqip ete.
2022 senesinden başlap Qırım aman-aman er kün uçucısız ve raketalarnıñ ücümlerine oğray. Rusiye akimiyeti arbiy obyektlerge ücüm yapılğanını inkâr ete.