Keriç energetik obyektlerge qarşı darbeler sebebinden bütünley elektrikasız qaldı, dep bildirdi Rusiye kontrolindeki şeer memuriyetiniñ yolbaşçısı İvan Koşel, onıñ aytqanlarını Rusiye kütleviy haber vastaları bildire.
"Duşmannıñ uçucısız ücümi neticesinde Keriç bütünley elektrikasız qaldı, yaşayış teminlev organları yedeklerini qullana", – dep bildire Koşelniñ aytqanlarını "RİA Novosti Krım".
Rusiye arbiyleri Qırım, Azaq ve Qara deñizlerinde ve qomşu Rusiye regionlarında tüşürilgen 93 dron aqqında bildirdi. Ukrayina arbiylerni ücümni şimdilik izaatlamadı.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.