Qırımdaki blekaut arta. İşğal etilgen yarımadanıñ Rusiye akimiyeti bildirgenine köre, saat 10-dan 17-ge qadar Keriç ve Yedi Quyu rayonında elektrik energiyasınıñ berilüvi toqtatılacaq.
"Krımenergo" haber etkenine köre, resmiy mesele – Tavrik magistral elektrik hatlarınıñ tamir işleri ola. Pompalar söndürilgeni içün ealige suv ketirilecek.
Aqyarda da elektrik teminlevi sıñırlavları kirsetildi. Şeerniñ Rusiye yolbaşçısı Mihail Razvojayev haber etkenine köre, Aqyar tışında elektrik hatlarındaki yükni eksiltmek içün bu mecburiy adım ola.
"Aqyarğa kelgen elektrik energiyası cedvelge köre berilmesi içün yeterli degil. Birinciden onı hastahanelerge, gidrolik tüyümleri ve diger müim obyektlerge bereler", – dedi o.
"Krımenergo" bildirgenine köre, sıñırlavlar bütün yarımadada bar. Cemaat içün müim olğan obyektlerge yedek elektrik teminlev shemaları qullanıla.
2026 senesi noyabr ayından başlap işğal etilgen Qırımda ve Aqyarda elektrik energiyası berilüviniñ sıñırlı rejimi çalışa. Rusiye akimiyeti bunı Ukrayina Mudafaa quvetleriniñ darbelerinden soñ yarımadadan tış magistral hatlardaki qazalarnen añlata. Cedvellerge riayet etilmey, ışıq tehnik imkânlarğa köre berile. Mesken yerlerde elektrik energiyası künde bir qaç saatqa berile ya da bir künden çoñ olmay.