Büyük Britaniya baş naziri Liz Truss, kelecek sene Birlşeken Qırallıq Ukrayinağa arbiy yardım içün eñ az 2,63 milliard dollar ayıracağını bildirdi. 2022 senesi bu ihtiyaclarğa aynı miqdar masraf etildi, dep bildirdiler baş nazirniñ ofisinde.
Haber etilgenine köre, Büyük Britaniyanıñ Ukrayinağa arbiy destegi çoqlu ateş raketa sistemaları (MLRS) kibi teçhizatlardan ibaret olması kerek.
"Ukrayinanıñ soñki aftalarda qazanğan ğalebeleri ilhamlandırıcı oldı", - dep yazıla Ukrayina ordusınıñ Rusiye quvetlerini aman-aman bütün Harkiv vilâyetinden sıqıştırıp çıqarğan vaqıtta yayınlanğan bildirmede.
"Ukrayina halqını bunı bildirmek isteyim: Birlşeken Qırallıq ileride de siz ile olacaq. Siziñ telükesizligiñiz bizim telükesizligimizdir", - dep qayd etti Truss.
Rusiyeniñ Ukrayinağa qarşı büyük istilâsı başlanğandan berli Büyük Britaniya izçenliknen Ukrayinanı destekley.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.