Kefede üç künden berli oktâbrniñ 7-nde ücümge oğrağan cermay bazasında yanğın söndürile.
Kütleviy haber vastaları bildirgenine köre, cerma bazasında tuman köterile – qoyu qara tuman şeerniñ er bir köşesinden körüne. Yaqın yerlerden 1129 insan tahliye etildi, dep bildirdi Kefeniñ Rusiye yolbaşçısı İgor Tkaçenko.
Yanğından sebep şeerde suv berilüvi zarar kördi, dep haber ete «Voda Krıma» Rusiye şirketi.
«Suv teminlev sistemasında basım zayıf, suv qısmen ya da bütünley berilmey bile», – dep aytıla haberde.
Kefeniñ Yaqın Qamış qasabasında avada kükürt dioksidiniñ artqanı qayd etildi, dep bildirdi Rospotrebnadzornıñ regionlarara idaresiniñ yolbaşçısı Natalya Penkovskaya TASSqa.
Şeer sakinlerini cam ve qapularnı qapatıp, evlerini avalandırmamağa çağıralar.
Kefedeki cermay bazasına oktâbrniñ 7-ne keçer gecesi ücüm etildi. Ukrayina Silâlı quvetleriniñ Baş ştabı cermay bazası «Rusiye Federatsiyasınıñ işğalci ordusınıñ ihtiyaclarını qarşılamaq içün» qullanalar, dep bildirdi. Kütleviy haber vastaları Kefe cermay terminalı – Qırımda cermay mallarınıñ miqdarına köre eñ büyüktir, dep yazğan edi.
ASTRA malümatına köre, cermay bazasına eki ATACMS raketası ücüm etti. Darbe neticesinde eñ az 10 ve 5 biñ kubometrlik eki tsisterna zarar kördi.
2024 senesi mart ayında oña Ukrayina Silâlı quvetleri endi ücüm etken edi, o vaqıt yaqarlıq magistral borusı zarar körgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.