Rusiye tarafdarı olğan qırımlı bloger ve Qırımnıñ Rusiye yolbaşçısı Sergey Aksönovnıñ mesleatçısı Aleksandr Talipov bildirdi ki, yarımadanıñ dört sakini, Ukrayina mudafaa quvetleriniñ Kefede neft terminalına ücüm etkeni vaqtında Rusiye ava mudafaasınıñ işini çekkenleri içün mesuliyetke çekildi. Bu aqta o, "Krımskiy smerş" kanalında bildirdi.
Başta Talipov, "Tavrida" trassasında, Primorsklı, Kefeli üç operatornıñ şahsiyetini belgilengeni aqqında ayta edi, soñra olarnıñ sayısı dörtke arttı.
"Al-azırda dört adam Qırım yolbaşçısınıñ ava mudafaasınıñ işini çekmekni yasaq etken fermanını bozğanı içün mesüliyetke çekilgen olardan ekisi çağına yetmegenler", — dep aytıla kanalda.
Olardan ekisi öz areketleri aqqında Rusiye akimiyetine şahsen bildirgen.
Rusiye FSB-sı qırımlılarnıñ tutulğanı aqqında haber etmedi.
Azatlıq Radiosınıñ Ukrayina telükesizlik hızmetindeki menbası haber etkenine köre, oktâbrniñ 13-ne keçer gecesi Ukrayina telükesizlik hızmeti ve Ukrayina Silâlı quvetleri mahsus tedbirler küçleriniñ "A" Mahsus operatsiyalar merkeziniñ uçucısızları Ukrayinağa qarşı cenkke çalışqan obyektlerge ücüm etti.
Kefedeki cermay terminalına qarşı evelki darbe orta küz ayınuñ 6-na keçken gecesi endirildi, bu aqta yerli telegram kanalları bildirdi, soñra Ukrayina silâlı quvetleri de haber etti. Bu terminal Ukraytna Mudafaa küçleriniñ ücümlerine ilk sefer oğramay. Rusiye-Ukrayina cenki vaqtında 34 rezervuardan 12-si zarar kördi.
Kefedeki cermay terminalı Ukrayina ücümlerine endi oğrağan edi – Ukrayina silâlı quvteleri 2024 senesi oktâbrniñ 7-ne keçer gecesi cermay bazasına ücüm etken edi. Kefedeki cermay bazasında yanğın bir aftadan ziyade devam etti.
Terminal yılda 12 million tonna cermay malı keçirgen ve aynı vaqıtta 250 biñ tonna mal saqlamaq içün savutları olğan eñ büyük soyu ola.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.