Aqyarda Rusiye mahkemesi Kefe sakini Nikolay Davıdçenkonı «devlet hainligi» ve patlayıcı yapıp saqlağanında qabaatlap, 17 yıl koloniyada qalmasına üküm etti. Bu aqta sentâbrniñ 12-nde Aqyarnıñ Rusiye prokuraturasınıñ matbuat hızmeti bildirdi.
Berilgen malümatqa köre, 59 yaşında erkek Ukrayina telükesizlik hızmetiniñ vekilinen internette bağlanıp, 2023 ve 2024 senesi Canköy rayonındaki mezarlıqta detonator ve patlayıcı çıqarıp, Yalta-Aqyar yolunda saqlağan eken.
Erkek qabaatını tanıdımı – aytılmay. Onıñ ya da imayesiniñ fikri aydınlatılmay. Ukrayina mahsus hızmetleri, hususan Ukrayina telükesizlik hızmeti bu ükümni izaatlamadılar. Rusiye uquq qoruyıcıları ve prokuraturasınıñ malümatı ne qadar doğru olğanını alternativ menbalarda ve cenk vaziyetinde teşkermek zor.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.