Noyabrniñ 11-nde saba Ukrayina Silâlı quvetleriniñ Baş ştabı Kefedeki cermay bazasına darbe aqqında bildirdi. Bu haber içtimaiy ağlarda müessise saifelerinde derc etildi.
“AO “Morskoy neftânoy terminal” (Kefe, Qırım Muhtar Cumhuriyeti, vaqtınca işğal etilgen topraq) darbege oğradı – Qırım yarımadasına ve vaqtınca işğal etilgen Ukrayina cenübine yanıcı-yağlayıcı maddelerniñ deñiz yolunen teminlevinde esas yerdir. Obyektte rezervuarlarğa ücüm qayd etildi. Zarar miqdarı ögrenile”, – dep aytıla haberde.
Qırım Telegram kanalları noyabrniñ 11-nde gece Rusiye Federatsiyası Ava mudafaasınıñ iş sesleri aqqında bildirdi. Gece 2-nde “Krımskiy veter” kanalı abunecileriniñ malümatına esaslanıp, böyle sesler aqqında yazdı.
Noyabrniñ 11-nde saba Kefeniñ Rusiye akimiyeti cermay bazası yaqınlarında yolnı qapattı, lâkin sebebi daa aytılmaddı. Rusiye Mudafaa nazirligi saba Qırımda urıp tüşürilgen 10 dron aqqında bildirdi, amma bunıñ delilleri kösterilmedi.
Hatırlatamız, keçken sefer Kefe cermay terminalı oktâbrniñ 12-nden 13-ne keçer gecesi ücümge oğradı. Büyük qısmı yanğınğa oğradı. Yanğın Eski Qırımdan ve Alupkadan köründi.
Bundan evel Kefe cermay terminalına oktâbrniñ 6-na keçer gecesi ücüm etildi, bu aqta yerli Telegram kanalları bildirdi, soñra Ukrayina Silâlı quvetleri de haber etti. Bu terminal Ukrayina Mudafaa küçleriniñ ücümlerine ilk sefer oğramay.
Terminal yılda 12 million tonna cermay malı keçirgen ve aynı vaqıtta 250 biñ tonna mal saqlamaq içün savutları olğan eñ büyük soyu ola.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.