Qırım.Aqiqat mühbiri haber etkenine köre, keçken künü aqşam Rusiye Federatsiyası tarafından işğal etilgen Aqyarnıñ çeşit rayonlarında qurşunatqıç atışları ve zenit-top patlavları eşitildi. Eñ çoq "Belbek" rus arbiy uçaq alanı yerleşken taraflarda ateş açıldı.
Rusiye kontrolindeki Aqyar yolbaşçısı Mihail Razvojayev yerli vaqıtnen saat 20:58-de telüke aqqında haber etti. Rusiye nezaret telgram kanalları uçucısızlarnıñ ücüm telükesi aqqında haber etken edi.
"Krımskiy veter" telegram kanalı, abunecilerine atıf etip, Aqyarnıñ Fiolent burnu rayonında ateş açıldı ve patlav sesleri eşitile, dep bildirdi.
"Qaçı uçaq alanında ve Solneçnoye köyünde kökni yarıqlatqan mavı projektorlar çalıştırıldı. "Belbek" uçaq alanında trassirovkalarnen ateş açıla ve projektorlar aydınlatıla", — dep yazdı "Krımskiy veter" telegram kanalı.
Öz nevbetinde, Razvojayev içtimaiy ağlardaki saifelerinde bildirdi ki, Aqyar qurtaruv hızmetiniñ malümatına köre, Şimaliy tarafta uçucısız parçaları evniñ damını bozğan, Monastır şossesi rayonında evniñ damına uçucısız parçaları tüşken.
Yerli vaqıtnen 23:01-de Aqyarnıñ Rusiye yolbaşçısı ava telükesi lâğu etilgenini bildirdi.
Ukrayinağa qarşı Rusiyeniñ keñ kölemlñ basuvı başlağan soñ Rusiyede ve işğal etken topraqlarında çeşit obyektler ava ücümlerine oğray. Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.