Ukrayına prezidenti ofisiniñ yolbaşçısı Andriy Yermak Kahovka gidroelektrostantsiyası bentiniñ bozuluvı Qırımnı içilgen suvsız qaldıra bile, dep bildirdi.
«Bu bir ekotsid. Rusiyeliler Herson vilâyetiniñ cenübinde ve Qırımda insanlarnı içilgen suvsız qaldırğanları içün cevap berecek, bazı mesken yerler ve biosfera yoq etile bile», – dep aytıla haberde.
2022 senesi Ukrayına lideri Volodımır Zelenskıy Kahovka gidroelektrostantsiyasınıñ dambası patlatıla bile dep, «Kahovka gidroelektrostantsiyasınıñ dambası bozulsa, [işğal etilgen Qırımnı suvnen temin etmek içün qullanılğan] Şimaliy-Qırım kanalı yoq olur», dep qayd etken edi.
Aynı vaqıtta Aqyarnıñ Rusiye yolbaşçısı Mihail Razvojayev şeerniñ suv teminlevine tesir etmeycek, dep ayta.
«Şeer öz suv anbarını qullana, suv yedekleri tolu, yedek suv çoqraqları da bar», – dep qayd etti o.
2014 senesi yarımada işğali başlanğan soñ Ukrayına akimiyeti Şimaliy-Qırım kanalını qapattı. Lâkin 2022 senesi Rusiye Dnipro özeniniñ Kahovka suv anbarınıñ alt havuzından Qırımğa suv berilüvini idare etken Şimaliy-Qırım kanalınıñ bütün gidrotehnik inşaatlarını zapt etti. 2022 senesi fevralniñ 27-nde Rusiye arbiyleri vaqtınca qurulğan damba, maşina köprü ve kanalnıñ esas mandal inşaatını bozdı.
2022 senesi martnıñ 17-nde berilgen malümatqa köre, Şimaliy-Qırım kanalından Dniprodan suv Canköy rayonınıñ Pobednoye köyüne qadar ketti.
İyünniñ 6-nda saba Rusiye Herson vilâyetinde Kahovka gidroelektrostantsiyasını patlattı, dep bildirdi Ukrayına arbiyleri. Herson vilâyetiniñ arbiy memuriyet yolbaşçısı Oleksandr Prokudinniñ aytqanına köre, 5 saattan soñ suv kritik seviyege kelecek, telükeli rayonlardan sakinler tahliye etilip başlandı.
Herson vilâyetiniñ arbiy memuriyeti Dnipronıñ sağ tarafında suv basa bilecek yerlerni ayttı. Mıkolayıvka, Olğivka, Lvove, Tâğınka, Ponâtivka, İvanivka, Tokarivka, Pridnestrovye, Sadove köyleri ve qısmen Herson şeeri – Korabel adası.
Ukrayına prezidenti Volodımır Zelenskıy Milliy telükesizlik ve mudafaa şurasını acele topladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.