Rusiye İç işler nazirligi qırımtatar asıllı ukrayinalı yırcı Jamalanı (Susana Camaladinova) qıdıruvğa ilân etti. O, Rusiye ordusı aqqında "yalan malümat" darqatuv ile qabaatlana ve mahkeme onıñ ğıyabiy şekilde apis etilmesine qarar berdi.
Şimdiki vaqıtta Avstraliyada para toplamaq maqsadınen gastrol seferinde olğan yırcı Instagram saifesinde bu haberni facepalm emotsiya ile izaatladı.
"Jamalağa ücümler em Rusiyede em de memleket tışında Moskvanıñ Qırım üzerindeki ükümranlığını tanımaqnı red etken ve Ukrayinağa qarşı cenkke qarşı çıqqan faallerni sustırma kampaniyasınıñ bir qısmı kibi körüne", - dep yaza New York Times.
Jamala, 2014 senesi Qırımnıñ Rusiye tarafından işğal etilmesini ve Rusiyeniñ Ukrayinağa qarşı büyük cenkini devamlı ve açıq şekilde takbih ete. 2016 senesi "Eurovision" yarışında Ukrayınanı temsil etip, qırımtatar sürgünligi aqqında yırladı ve ğalebe qazandı.
Rusiye "1944" yırınıñ "Eurovision" yarışındaki siyaisy çıqışlarnıñ qaidelerini bozğanı içün yarışta iştirak etmesine narazılıq bildirgen edi. Amma AP yırnıñ Rusiyeni ve Şuralar Birligini tenqit etmegeni hatırlata.
"Jamala Rusiye cenkni başlatqan soñ Ukrayinadaki vaziyet ile bağlı içtimaiyetke haber bermesinen belli. Bunıñ içün o Rusiye rejimini defalarca tenqit etti. V ye neticede bu da bu vaziyetke sebep oldı", - dep yazıla Eurovision Fun saytında.
Yılnıñ başında "QIRIM" yañı folklor albomı aqqında BBC-ge intervyü berir eken Jamala onıñ maqsadı Qırımnıñ sesi olmaqtır, dedi.
"Rusiye imperiyasınıñ asırı, soñra Şuralar Birliginiñ, şimdi de Rusiyeniñ. Olarnıñ episi bizni sustırmaq içün pek çoq propaganda darqattılar. Soñra bütün dünyağa biz yoqmız, dep ayttılar".
Keçken sene Jamala Vaşingtonğa barıp kelgen edi. Anda o Amerika ükümetiniñ temsilcileri ve ABD prezidenti Joseph Biden ile körüşti.
"Tünevin Kennedi Merkezinde keçirilgen 45-nci festivalde acayip çıqıştan evel ukrayinalı yırcı Jamala ile körüşmekten pek memnün oldım. Jamalanıñ Rusiyeniñ qırımtatarlarğa munasebetine diqqat celp etmek işi bugün küçlü rezonans doğura. Qırım Ukrayinadır", - dep yazğan edi Twitter Entoni Blinken.
Great to have met Ukrainian singer Jamala yesterday before her wonderful performance at the 45th Annual @KenCen Honors. Jamala%27s work to bring attention to Russia’s treatment of Crimean Tatars resonates powerfully today. #CrimeaIsUkraine pic.twitter.com/kmT7A6YBlB
— Secretary Antony Blinken (@SecBlinken) December 5, 2022
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.