İşğalden ükümge qadar: Oleg Prıhodkonıñ ikâyesi (fotogalereya)
Qırım işğal etilmezden evel Oleg Prıhodko «Svoboda» fırqasınıñ bölüginiñ başında edi. Menlik inqilâbı vaqtında üç kere Mustaqillik meydanında oldı
Eviniñ azbarında 2014 senesinden soñ bile Ukraina bayrağı yata edi
Evinde ve azbarında mavı-sarı ve qırmızı-qara bayraqlar, avtomatlar, Stepan Benderanıñ resmi, perun resmi asılıp tura edi
«Olar öz Rusiye bayraqların er kes körsin dep asalar. Men ise ukrain perunını asıp qoyacağım, kendi evimde», – dey faal. Bu resimni Oleg özü yaptı
2019 senesi fevral ayında Prıhodkonıñ evine tintüvnen keldiler. Evindeki ukrain timsalıtını FSB hadimleri tutıp aldı
Tintüv, Prıhodko sovet akseriniñ abidesine svastika resmini yapqanı içün keçirilgen edi. Oleg bunı inkâr ete
2019 senesi Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlap tevqiff ettiler
Oleg, birinci tintüv ve memuriy tevqiften soñ Qırımdan köçüv meselesini qorantasınen muzakere ettimi sualine Lübov menfiy cevap berdi: "Asılında o, ic bir vaqıt Qırımnı Rusiye kibi qabul etmey edi. Onıñ içün Qırım - bu Ukraina, ve eñ esası - onıñ evi. Qorantamızda köçme meselesi köterilmey edi bile".
Oleg Prıhodko Aqmescitte mahkeme oturışında, 2019 senesi dekabrniñ 25.
2020 senesi aprel ayında o Rostov-na-Donuğa etap etildi
2020 senesi iyün ayı. Bu mahke oturışından Prıhodkonı quvaladılar, çünki o «nizam tertibini bozğan» edi
Oleg Prıhodkonıñ advokatlarından birisi Nazim Şeyhmambetov, Rostovada faal sıçavullarnen bir kamerada tutula edi, dep bilidrgen edi.
«Prıhodkonıñ sağlığınen bağlı şikâyetleri yoq. Onı sıçavullar yaşağan kamerağa qapatqanlar. Olarnı sıq-sıq quvmağa kerek ola, dep ayta. Bu onı pek raatsızlay ve raatlanmağa, mahkeme oturışuvlarına azırlanmağa bermey».
Prıhodkonıñ alı izolâtorda «pek fenalaştı». Onıñ hatırlatqanına köre, adamnıñ «hronik aşqazan içekler, siydik sistemasınıñ hastalıqları bar, eki taraflı eşitüv ve körüv problemleri bar»
2020 senesi noyabrniñ 21-nde Moskvada faaller Prıhodkonı ve diger siyasiy mabüslerni azat etmek talabınen aktsiya keçirgen ediler
2021 senesi fevralnıñ 25-nde Prıhodko soñki söznen çıqışta bulunıp, qabaatını tanımağanını bildirdi. Rusiyeniñ Rostov-na-Donu Cenübiy okrugınıñ arbiy mahkemesi oturışuvında prokuror qırımlı Oleg Prıhodko içün 11 yıl sert rejimli koloniya cezası berilmesini istedi.
Martnıñ 3-nde Rostov-na-Donudaki Cenübiy arbiy bölgesiniñ mahkemesi Qırımdan ukrain tarafdarı faali Oleg Prıhodkonı terror ücümini azırlağanında ve patlayıcı maddelerni qanunsız yapqanında qabaatlı tanıdı ve 5 yıl sert apis cezasına mahküm etti