Rusiye kontrolindeki Qırım prokuraturası 17 yaşındaki qırımlığa qarşı cinaiy dava boyunca qabaatlav qararını tasdıqladı. Onı Rusiyede yasaq etilgen "terroristik teşkilât"nıñ faaliyetinde iştirak etkeninde qabaatlaylar.
Rusiye tahqiqatınıñ versiyasına köre, çağına yetmegen qırımlı içtimaiy ağlardan birinde "terror teşkilâtına bağışlanğan toplulıqqa qoşuldı" ve "ekstremist edebiyatını" ögrendi.
Genç, "terrorist mefküresini paylaşqanı" içün "uçucı cihazını ve onıñ patronlarını satın alıp, Aqmescit sakininiñ mal-mülküni yoq etmege azırlanğanında" qabaatlana.
"KrımSOS" aq qoruyıcı teşkilâtınıñ malümatına köre, 2024 senesi eñ azından 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.