Orta küz ayınıñ 29-nda saba RF tarafından işğal etilgen Qırımğa uçucısız uçaqlar ücüm etti, bundan soñ Aqmescit rayonınıñ Sarabuz qasabasında ve Aqmescitniñ Gresovskiy qasabası civarında yanğınlar çıqtı.
Sarabuz qasabasındaki neft bazasına uruluv saat 6:26-da oldı. Bundan evel bu neft bazasına orta küz ayınıñ 17-nde ücüm etilgen edi ve o, bir qaç kün devamında yanıp turğan edi.
Aqmescitte uçucısız uçaqlarnıñ ücümi neticesinde Sarabuz qasabası civarında yerleşken neft bazası yanıp başladı. Bunı Qırım.Aqiqatqa yerli sakinler bildirdi .
"Krımskiy veter" yayınlağan videoda, eki yanğından köterilşp tarqalğan qoyu qara dumannı körmek mümkün.
"Krımskiy veter" yazğanına köre, ücüm etilgen Aqmescitteki neft bazasına "tünevin arbiy benzin vagonları maskirovka ağlarında kirgen ve çıqqan". Bu neft bazası, Sarabuz neft bazası kibi, Rusiye ordusını temin etmek içün faal qullanıla.
Qırımnıñ Rusiye yolbaşçısı Sergey Aksönov öz telegram kanalında bildirdi: "Aqmescitte duşmannıñ pilotsız uçaqınıñ ücüm etmesi neticesinde yanıcı-yağlayıcı malzemeleri olğan konteynerge urudı. Neticede yanğın çıqtı. Zarar körgenler yoq. Fevqulâde hızmetleri anda çalışa".