Ukrayina prezidentiniñ Qırım Muhtar Cumhuriyetindeki temsilciliginde Rusiye işğal etken topraqlarda, hususan Rusiye işğal etken Qırım ve Aqyarda «siyasiy mabüslerge kerekli tibbiy yardımnıñ kösterilmemesini» muzakere etecekler.
Vaqtınca işğal etilgen topraqlarda siyasiy mabüs aqlarınıñ bozuluvına bağışlanğan brifing 2025 senesi oktâbrniñ 2-nde olacaq, dep bildirdi Ukrayina prezidentiniñ Qırım Muhtar Cumhuriyetindeki temsilciligi.
Tedbirde Ukrayina prezidentiniñ Qırım Muhtar Cumhuriyetindeki daimiy vekili Olğa Kurışko, «BM Qadınları» Ukrayina temsilciliginiñ reisi Sabin Freyzer Güneş, OO «Numo, sestrı», MBF «Ukrayina cemaat sağlığı fondu», «Qırım aq qorçalayıcı gruppası, «KrımSOS» ve ZMINA aq qorçalayıcı ve cemaat teşkilâtlarınıñ faalleri iştirak etecek ola.
Haberde tedbir iştirakçileri «siyasiy mabüslerge kerekli tibbiy yardımnıñ kösterilmemesi ve ayatlarınıñ telükede olğanına» diqqat ayıracaq, dep aytıla. Qadın siyasiy mabüsleriniñ problemleri ayrıca qayd etilecek, «cınsiyetlerinden sebep yüklülik vaqtında ekimler baqmay, hronik hastalıqları tedaviylenmey, maneviy yardım yetmey».
Brifing çerçivesinde esir tüşken qadınlarnıñ fotoresimleri ve cenk areketleri yerlerinden qurtarılğan Qırım ressamlarınıñ resim sergisi olacaq.