İşğal etilgen Qırımnıñ Rusiye akimiyeti Rusiye Federatsiyası Devlet dumasına Rusiyede «çetel agenti» olaraq tanılğan müelliflerniñ eserlerini açıq icra etüv ve numayış etüv yasağı teşebbüsini yolladı. Bu aqta Qırımnıñ Rusiye parlamentiniñ spikeri Vladimir Konstantinov bildirdi.
Leyhağa köre qanunda «çetel agentleri» icadını qullanuv yasağı maddesini pekitmege ve bu maddeni bozuv içün memuriy mesüliyet meselesini baqmağa teklif etile. Nasıl bir mesüliyet ola bile aytılmay.
Regional parlamentler, hususan Qırım parlamentiniñ qanun çıqaruv teşebbüs aqqı bar ve olar Rusiye Federatsiyası Devlet dumasına tekliflerini yollay bile.
Sentâbr ayında Rusiyede «çetel agentlerine» maarif ve tasil faaliyetinen oğraşmağa yasaqlağan tüzetüvler çalışıp başladı. Kitap saasında bir belgisizlik peyda oldı, çünki qanun metninde «çetel agentleriniñ» kitaplarını satmaq yasaqqa tabiiymi añlaşılmay. Bir çoq tükân olarnı evelden satıp başladı, bazıları ise raflardan aldı ya da belli işaretler yapıştırdı.
Adliye nazirliginiñ «çetel agentleri» cedvelinde şimdi 1050-den ziyade şahıs ve teşkilât bar. Cedvel aman-aman er afta deñişe.