Ukrayina akimiyeti 2026 senesi Sabandan berli işğal etilgen Dnipornıñ sol yalısındaki Oleskı şeerine aşayt mahsulatını ketire. Anda "eki biñge yaqın insanımız, olarnıñ arasında aman-aman elli bala", dep bildire İlk küzniñ 27-nde Herson vilâyetiniñ arbiy memuriyeti.
Berilgen malümatqa köre, "bu eñ büyük ameliyatlardan biri oldı". OVA-da böyle teslimatnıñ tam vaqtını aytmadılar
"Deñiz piyade ordusınıñ 30-ncı korpusı, "Yıldırım" taktik taqımı, deñiz piyade ordusınıñ 34-ünci brigadası, "Borisfen" brigadası, NGU 11-inci brigadasınıñ "Bolgariçi" bölügi, Milliy gvardiyanıñ 34-ünci polku ve 79-ıncı sıñır taqımı ile işbirlikte şeerniñ belli yüz lokasiyasına bir kereden 4000 kilogramm aşayt ketirildi", — dep aytıla haberde.
Herson vilâyetiniñ arbiy memuriyetiniñ bildirgenine köre, "işğalciler bu yardımnı da toqtatmağa tırışalar".
"Rusiye arbiyleri aşayt malları ile uçaqlarnı urıp tüşüreler, balalar ve qartlar içün azırlanğan aşayt mallarını almağa ya da satmağa tırışalar. Gumanitar paketlerni alğan Oleşkı sakinlerini işğalciler yaqalay, mağazğa taşlay, urıp kçtekley ve zorbalıq qullanalar", — dep aytıla haberde.
Ukrayina tış işler naziri Andriy Sıbiğa İlk küzniñ 23-nde BMT Telükesizlik şurasınıñ toplaşuvında çıqışta bulunıp, Oleşkı qamaçavı aqqında tarif etti ve ortaqlarnı Rusiyeden gumanitar koridorlarnı açmağa talap etmege çağırdı.
Oleşkı Rusiye tarafından 2022 senesi Kiçik ayda, keñ kölemli basuvnıñ ilk künlerinde işğal etildi. Şeer Dnipornıñ sol yalısında yerleşe, şimdi bu yer Herson vilâyetiniñ serbest ve işğal etilgen qısımları arasında tabiiy sıñır olaraq qalmaqta.