Qırım.Aqiqat, qoluna silâ alıp, Ukrainanı Rusiye istilâsından qorçalağan qırımlılar aqqında maqalelerni derc etmege devam ete. Daa evel tarif etkenimiz kibi, qırımlı fotoressam, sabıq siyasiy mabüs Gennadiy Afanasyev ve aq qorçalayıcı Sergey Mokrenük cenkke ketti. Bu İsa Akayev aqqında bir ikâye – cenkke ketken qırımlı qurucı müendis ve çoq balalı baba.

İstihbaratçı İsa Akayev olaraq belli qırımlı Nariman Bilâlov cenkte ilk sefer degil. Rusiye Qırımnı işğal etken 2014 senesi o, yarımadanı terk etti ve Ukrainanı qorumaq içün Donbasqa yol aldı. Soñra barışıqsever ayatqa qayttı, qırımlı semetdeşlerine esas Ukrainada yerleşmege yardım etti, Vinnıtsâ vilâyetinde qırımtatar ananelerini populârlaştırdı. Amma Rusiyeniñ Ukrainağa qarşı cenk başlatması qırımlını qoluna silâ almağa mecbur etti. Onıñ Qırım.Aqiqatqa bildirgenine köre, bu sefer Rusiye ile cenkni Qırımnı Ukraina kontroline qaytarıp bitirmege ümüt ete.

«Duşmanlarnıñ açuvı, analarımıznıñ quvançı içün yaşaycaqmız»

İsa Akayev cenk künleri aqqında er bir haberini optimizmnen yaza ve tezden Ukraina ğalebe qazanır, dep işandıra.

«Küç yete, keyfimiz cenkâver», – dep yazdı o, Facebookta martnıñ başında.

Qırımlı Ukraina sakinlerini telâşlanmamağa ve cenk qıyınlıqlarından kederlenmemege çağıra.

«Er şey yahşı. Moskoviya tarafına ketemiz. Şimdi Kyiv civarında er kesni (Rusiye arbiylerini – QA) dağıtayıq ve, Allah berse, Moskvağa doğru ketemiz. Er şey yahşı olacaq, balalar. Mıtlaqa ğalebe qazanacaqmız. Başqa variantımız yoq. Biz – ruhu qaviy, qolu küçlü ve zeinimiz bayağı çevik. Qasevetlenmege, telâşlanmağa kerekmey! Er şey yahşı olacaq, tuvğanlarım. Biz mıtlaqa ğalip çıqacaqmız, şübhelenmiñiz. Böyle güzel memlekette, böyle acayip halqnen ğalebe qazanmamaq mümkün degil. Dayanıñız, küçleniñiz, qasevetlenmeñiz. Beraber tırışayıq. Bu er keske tesir ete: em silânen olğanlarğa, em yardım etkenlerge, em dua etkenlerge», – dedi o, martnıñ 7-nde.

Fevralniñ 28-nde İsa Akayev qardaşlarınen Rusiye arbiylerine, hususan musulmanlarğa video muracaatını çıqardı. O, Rusiye Silâlı quvetlerinden ketmege çağırdı, Ukrainağa cenkleşmege kelgenlerni ise «kömmege» söz berdi.

İsa Akayev Ukraina Rusiye ordusını yeñeceginden emin ve cenkten soñ er kesni Qırımğa davet ete: «Biz mıtlaqa ğalip çıqarmız, körersiñiz. Zaferden soñ ise er kesni Qırımğa davet etem. Bizim içün dua etiñiz, biz de siziñ içün dua etecekmiz. Qıyın olacaq. Ne yazıq ki, qurbanlar olacaq. Amma, mence, ğalebe ve azatlıq buña lâyıq. Biz ğalebe qazanacaqmız ve er şey yahşı olacaq. Toylar olacaq, balalar doğacaq. Duşmanlarnıñ açuvı, analarımıznıñ quvançı içün yaşaycaqmız».

«Qırımnı qaytarmağa mecburmız»

Ukraina içün kene cenkleşmek qararını İsa Akayev «sekiz yılda yapıp bitiremegenlerni» yapmaq – Qırımnı qaytarmaq – içün aldı, dep ayta.

«Yüce Allah böyle buyura: sizni eviñizden quvğanlarnen cenkleşiñiz. Bu Rusiye ile küreşmek içün bir sebep ola. O, bizni evimiz Qırımdan quvdı. Sekiz yıl devamında (Qırım Rusiye işğali altında bulunğan müddet – QA) işimizni yapıp bitiremedik. Şimdi bitirmek kerek. Bir çoq insan bu müddet devamında Rusiyenen añlaşmağa mümkün olmağanından emin oldı. Onı yeñmek kerek, soñra ise laf etmek mümkün. Qırımnı qaytarmağa mecburmız. Ve onı mıtlaqa qaytaracaqmız. Bizge ait olğan şey içün soñuna qadar küreşecek ve ğalebe qazanacaqmız. Biz endi ğalipmiz, er kes cenkleşe: kiçiklerden büyüklerge qadar – bu cenkte qorçalaylar», – dep ayttı o, Qırım.Aqiqatqa.

Yalta manzarası

Qırımlınıñ fikirince, Rusiye Ukrainağa qarşı cenkni yutturacaq, çünki «Ukraina halqına doğru qıymet kesemedi».

«Rusiyelilerge bir şey aytmağa isteyim, daa 2014 senesi bizge ücüm etip yañlış yaptılar. Olar halqımızğa doğru qıymet kesemediler. Kimse bizge keder etmese, bu cenkni Moskvadaki Qızıl meydanda bitirirmiz. Rusiye ordusınıñ Ukraina şeerlerine yapqanlarını körip kederlenemiz. Amma bizni bunen yeñemezler. Daa açuvlı olıp, daa faal qorunacaqmız», – dep ayta İsa Akayev.

Qırım batalyonınıñ babası

İsa Akayev Ukrainanı qorumaq içün Donbasqa ketken 2014 senesi belli oldı. Bundan evel adiy yaşayışı, işi bar edi, balalarnı baqtı. Donbasqa ög sırağa ketkende «Qırım» göñülliler batalyonını qurdı – askerleri, özü kibi, qırımlılar oldı. Onıñ iştirakçileri Qırımnı Ukraina kontroline qaytarmaq ğayesinen birleşti.

İsa Akayev ve «Qırım» batalyonı

İsa Akayev ve ortaqları Donetsk vilâyetindeki Savur-Moğıla uruşlarında iştirak etti, soñra Ukraina kontrolinde qalğan Mariupolni qorçaladı.

Uzun vaqıt devamında qırımlı adını aytmayıp, gizli cenkleşken edi. Qorantası Qırımnı terk etken soñ, balaklavasını çıqardı. Keçken yılları İsa Akayev Ukraina Silâlı quvetleri erkânında «Qırım» batalyonını resmiyleştirmege tırıştı. Amma bu mesele öyle de çezilmedi.

Kene de Qırımda İsa Akayevni Rusiye tecavuzına tirenüvniñ efsanesi dep adlandıralar.

Ailesinen beraber Vinnıtsâ vilâyetinde yerleşti. Qırım yetmey ve evge istey, dep aytqan edi.

Rusiye Ukrainağa ücüm etmezden evel İsa Akayev Rusiye akimiyetiniñ siyaseti sebebinden yarımadanı terk etken qırımlılarğa yerleşmege yardım etti. Amma Ukrainada başlağan cenk planlarını kene deñiştirdi. Şimdi İsa Akayevni evde ömür arqadaşı ve doquz balası bekley.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.