Avropa hatıra ve vicdan platforması, 2025 senesi mukâfatı Rusiye tarafından işğal etilgen Qırımdan Ukrayin aq qoruyıcısı, vatandaş jurnalisti ve emşire İrına Danılovıçqa berilgenini ilân etti. Mukâfat onıñ sivil cesürligini, mustaqil jurnalistikasını ve insan itibarını qorçalağanını qayd ete.
Qayd etilgenine köre, taqip, qorquzuv, hırsızlav ve işkencege baqmadan, Danılovıç adaletsizlikni aydınlatmaq ve aqiqatnı qorçalamaq içün qattı israrlı olğanını köstergen.
Avropanıñ eñ repressiv regionlarından birinde demokratik degerliklerge ve esas serbestliklerge sadıqlığı onı tek jurnalist ve tibbiy hadim olaraq degil, aynı zamanda tirenüv ve ahlâqiy dayanıqlıq timsali de yapa.
"Aqiqat telükelige çevirilgende, onı seslendirgenler nişan ola. Bu mukâfat tek İrınanıñ cesürligine sayğı degil, adaletsizlikni aydınlatqanı içün taqip etilgen er bir jurnalistni qorçalamaq çağıruvıdır. İrına Danılovıç hatırlatqanı kibi, eñ qaranlıq yerlerde bile bir ses aqiqatnı aydınlata bile", — dep ayttı Marek Mutor, platforma prezidenti.
Hatırlatamız, 2022 senesi qırımlı jurnalist ve aq qorçalayıcı İrına Daniıovıçnı FSB hadimleri alıp ketti. Daa soñra onı patlayıcı maddeler saqlağanında qabaatladılar, tahqiqat izolâtorında ise otit sebebinden uzun müddet tibbiy yardım kösterilmedi. Neticede faalniñ bir qulağı eşitmey, amma tedaviylenmey.
Keçken sene avgust ayında, koloniyada bulunğan soñ, Danılovıç qulaq ve baş ağrıları sebebinden tibbiy bölükke muracaat etti, amma ekim Lidiya Morozova, Danılovıç sağırlaşqan soñ, ağrı özü keçecek, dep ayttı.