İnterpol, qırımtatarı Reşat Ametovnıñ hırsızlanması ve öldürilüvinden şübheli sayılğan üç kişini qıdıruvğa ilân etmege razı olmadı. Bu aqta Qırım Muhtar Cumhuriyetiniñ prokurorı İgor Ponoçovnıy «Ukrayınska pravda» ukrain haber agentligine bildirdi.
«Qırım Muhtar Cumhuriyetiniñ prokuraturası İnterpolnıñ halqara politsiya işbirliginiñ departamentine muracaat etip, şübhelilerni halqara qıdıruvğa ilân etmege ve «qırmızı işaret» qoymağa rica etti. İnterpol, şübhelilerni qıdıruvğa ilân etmege razı olmayıp, siyasiy, arbiy, diniy ya da ırq faaliyetine kirişmek yasaq olğanına ve qanunğa uyğun olmağan bir şekilde arbiy birleşmelerniñ quruluvı ve iştirak etüv davalarında teşkilâtnıñ kanalları ve imkânlarını qullanmaq imkânsız olğanına esaslandı», – dep bildire prokurornıñ aytqanlarını neşir.
Bu malümatnı QMC prokuraturasınıñ matbuat kâtibi Yekaterina Didenko Qırım.Aqiqatqa tasdıqladı.
«Olar (İnterpol – QA) mında Rusiye ve Ukraina arasındaki siyasiy meseleni köre, amma QMC prokuraturası insan hırsızlavı sebebinden (şübhelilerni – QA) ilân etmege rica etken edi», – dedi Didenko.
SEE ALSO: «Bu bir qorquzuv aktsiyası edi»Qırım Muhtar Cumhuriyetiniñ prokuraturası sentâbrniñ 10-nda Reşat Ametovnı öldürgenler belli oldı, dep bildirdi.
Qırım Muhtar Cumhuriyetiniñ politsiyası qırımtatar faali Reşat Ametovnıñ hırsızlanması ve öldürilüvinden şübheli sayılğan «Qırım samooboronasınıñ» eki iştirakçisi ve Rusiye Silâlı Quvetleriniñ sabıq arbiyini qıdıruvğa ilân etti.
2014 senesi martnıñ 3-nde saba Aqmescitniñ Maryino qasabasında yaşağan üç balanıñ babası, 39 yaşında Reşat Ametov evden çıqqan edi. Tuvğanlarına arbiy komissarlıqqa barıp, Ukraina ordusınıñ göñüllileri sırasına yazılacağını ayttı. Video kameraları onı, Rusiyeniñ Qırım işğaline qarşı Lenin meydanında Qırım ükümetiniñ binası ögünde bir kişilik narazılıq keçirgen kişini, qayd etti. Videoda körüne ki, Qırım «samooboronasınıñ» bir qaç vekili onı meydanda tutıp, maşinağa mindire. Eki aftadan soñ Reşat Ametov Qarasuvbazar rayonınıñ Ortalan (Zemlâniçnoye) köyü yanındaki tarlada ölü tapıldı. Erkekniñ cesedinde işkence izleri bar edi, başı şeritnen sarılğan edi, yanında ise qırçma tapılğan edi. Daa soñra çıqarılğan neticelerge köre, ölümniñ sebebi közüne saplanğan pıçaq yarası oldı.
2017 senesi Ukrainanıñ beşinci prezidenti Petro Poroşenko 2014 senesi baarde öldürilgen qırımlı Reşat Ametovğa Ukraina Qaramanı unvanını berdi.
BM insan aqları Yuqarı komissarınıñ idaresi azırlağan maruzasında Ametovnıñ öldürüvini mahkemesiz idam dep adlandıra.