Ukrayina prezidenti Volodımır Zelenskıy ilk küz ayına qadar Ukrayina içün qıyın bir devir olacağını tahmin etti. Jurnalistlernen subet vaqtında, eger de Rusiye kerginlik yolunı saylasa, Ukrayina, ABD ve Rusiye arasında yañı üç taraflı körüşüv çeçek ayında ya da ondan soñra ola bile, dep bildirdi.
"Rusiye kerginleşüv yolunı saylasa, üç taraflı körüşüv olur, dep tüşünem. Ve onı çeçek, quralay ya da ilk yaz aylarında keçirmege tırışacaqlar. Maña köre, bu aylar olar içün müim aylar. Ve menimce, ilk küz ayına qadar bizim içün pek qıyın olacaq", — dedi Zelenskıy.
Ukrayina prezidentiniñ aytqanına köre, ABD yazdan başlap saylavlarnen pek meşğul olacaq ve olarnıñ "bir öz iç siyasiy müddeti bar, tahminen arman ayında"."Yani bu baar-yaz vaqtı siyasiy, diplomatik ceetten bayağı qıyın olacaq. Ukrayinağa qarşı basqı ola bile. Ve cenk meydanında da olacaq. Amma biz Ukrayinanıñ milliy menfaatları ne olğanını ve telükesizlikni ne temin ete bilecegini añlaymız", — dedi Zelenskıy.
O, bu devirde Rusiyege de yeterli qadar basqı yapılması müim, dep qoştı.
"Misal olaraq, ortaqlar bu sene iç bir vaqıt olmağan, tarihiy, deñiştirici ve belli bir manada ğalebe qazanğan NATO sammitini keçire bileler. Amma bu olarğa bağlı, olar kerçekten nege azır ve biri-birine qarşı degil de, er keske qarşı olğan telükelerge mesüliyetli yanaşalarmı", — dep qayd etti Ukrayina prezidenti.