İlhaqtan soñ yarımadanı terk etken qırımtatarlarnıñ mülkü telüke astında, dep saya qırımtatarlarnıñ lideri Mustafa Cemilev. Onıñ fikrince, adamlarnı mal-mülklerinden marum qaldıra bileler. Bunı o Qırım.Aqiqatqa tefsir bergende ayttı.
"Qırımtatarlarnıñ 10 %-ına yaqın, bizim qararlamamızğa köre 25-30 biñ adam, Qıımnı terk etti ve şimdi Ukrainanıñ qıtasında yaşay. Amma olar qaldırğan topraqlar telüke astındadır. Ekseriyet rus pasportlarını almağa mecbur oldı, çünki bu pasportnı almasalar, topraqnı, vatannı qaldırıp ketmek kerek. Bizim şiarımız ise: "Qırımda yaşa!", - dedi qırımtatarlarnı lideri.
Cemilevniñ özüniñ ise Bağçasarayda evi ve topraq payı qaldı.
"Bağçasarayda evim, oğlumnıñ evi bar. Qorantamızdan Rusiye vatandaşlığını kimse almadı, pasportlarımız yoq, demek, mülkümizni de tutıp ala bileler", - dedi o.
Rusiye, Qırımda Vladimir Putinniñ "sıñır bölgeleri" aqqında fermanı astına tüşken topraqlarnı tutıp alacaqları aqqında bildirdi.
Daa tafsilatlı Qırım.Aqiqatnıñ yañı yayınında seyir etiñiz.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.