Rusiyede Kursk vilâyetinde Ukrayina arbiy quvetleriniñ arbiy ameliyatını başlağanı sebebinden Ukrayina ile barışıq muzakerelerini red eteler. Böyle bir beyanatnı Kreml yolbaşçısı Vladimir Putinniñ yardımcısı Yuriy Uşakov yaptı.
O, muzakere esnasına kirmekni "tamamınen yersiz" dep adlandırdı ve ilerideki muzakereler "cenk meydanındaki vaziyetke, şu cümleden Kursk vilâyetinde olğan vaziyetke bağlı olğanını" qayd etti.
Rusiye tış işler naziri Sergey Lavrov avgustnıñ 19-nda Putinniñ, ukrayin ameliyatından soñ muzakereler aqqında söz yürsetilmey, degen beyanatını tekrarladı.
Amerikanıñ cenkni tedqiq etüv institutında eminler ki, böyleliknen, Rusiye memurları cenkni toqtatmaq içün muzakereler keçirilmegeni içün Ukrayinanı mesüliyetke çekmege tırışa.
"ISW, Rusiyeniñ Ukraina ile mündereceli muzakerelerge meraqları yoq ve yoq edi, dep tüşünmege devam ete, ve Kreml, muzakerelerge keder etken Rusiyeni degil de, Ukrayinanı köstermek tırışa", — dep aytıla esabatta.
Rusiye kütleviy haber vastaları, blogerler ve akimiyet vekilleriniñ malümatına köre, Ukrayina ordusı avgustnıñ 6-nda Rusiyeniñ Kursk vilâyetine kirdi. O vaqıttan berli regionda uruşlar devam ete. Rusiye Federatsiyasınıñ Kursk, Bryansk ve Belgorod vilâyetleriniñ akimiyeti regionlarda kontrterroristik ameliyat rejimini tayin etti.
Avgustnıñ 13-nde TİN, Ukrayina Rusiye Federatsiyasınıñ Kursk vilâyetinde topraqlarnı zapt etmek istemey, ukrayinlerniñ ayatını qorumaq ve Rusiye darbelerinden qorunmaq istey, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.