İsrail baş naziri Binyamin Netanyahu telükesizlik quvetleriniñ yolbaşçılarınen körüşip, İranğa qarşı tenbi darbesini muzakere etti. Bu aqta Ynet İsrail haber portalı bildi.
Berilgen malümatqa köre, «İsrailge qarşı ücüm yapılacağına dair» istihbarat malümatı peyda olsa, bu variant baqılacaq.
İsrail akimiyeti darbe İranda «Hamas» (ABD ve AB tarafından terroristik dep tanılğan) gruppirovkasınıñ siyasiy lideri İsmail Haniya ve «Hezbolla» radikal islâm gruppirovkasınıñ komandanı Fuad Şukrnıñ öldürilüvine cevap olaraq darbe endirile bile, dep tahmin ete. İsrail Haniyanıñ öldürilüvinden mesüliyetni öz boynuna almadı.
İran qorquzuvlarına baqmadan, şimdilik bir talimat deñişmeleri yoq, dep qayd ete İsrail ordusınıñ matbuat kâtibi Daniel Hagari. İran Haniyanıñ öldürilüvi sebebinden İsrailden intiqam almağa vade etti – tünevin, avgustnıñ 4-nde, ABD ve arap memleketleriniñ cevapnı yımşatmaq ıntıluvlarını red etti, dep yaza The Wall Street Journal muzakere ketişatını bilgen menbalarğa esaslanıp. «Cevabımız cenkke yol açacaqmı müim degil», – dep ayttı İran vekilleri.
Axios neşiriniñ malümatına köre, ABD İran İsrailge bugün, avgustnıñ 5-nde, darbe endire bile, dep bekley.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.