Rusiyeniñ Zelenokumsk şeerinde koloniyada tutulğan aq qorçalayıcı ve vatandaş jurnalisti İrına Danılovıçnıñ qız qardaşı cezalarnı yerine ketirüv federal hızmetiniñ hadimleri "faalni bile-bile ölümge alıp keteler", dep bildirdi. Bu aqta Danılovıçnıñ tuvğan qardaşı Olga Novitska Qırım.Aqiqat mühbirine bildirdi.
Onıñ malümatına köre, İrınanıñ tibbiy kartında ses seviyesi artmamalı, dep qayd etilgen. İK-7 yolbaşçısı muzıka açmamağa emir etti, amma bazı nezaretçiler buña qulaq asmay ve saba 6-dan aqşamğa qadar muzıkanı pek sesli açalar.
"Muzıka bütün koloniyağa yanğıray. İrına telefon ete, artıq ağrı ve horluqlarğa dayanamay, muzıka miynini parçalay, dep ayta. Nevbetçi bölükke telefon etip, vaziyetni añlatam ve bazı nevbetler añlayışlı olıp muzıkanı söndüreler, bazıları açıq-açıq körmemezlikke ura, muzıka yanğıramay, dep aytalar, men ise telefonda eşitem. İra telefon etip şikâyet etmesin dep aytalar. Özüni tanıtsınlar dep rica ete, qapatalar ve soñra irişip olamayım. Tek Stavropol ülkesi cezalarnı yerine ketirüv federal hızmetine telefon etsem, bir faydası ola", – dep tarif etti Olga Novitska.
İrına Danılovıç apiste yatqanlarğa izsiz işkence yapıla, açıq yarıqnen ve pek sesli muzıkanen qıynaylar, dep haber etken edi. Koloniyada bu şikâyetlerden soñ teşkerüv oldı, amma bir bozuv qayd etilmegen, dep tarif etti Olga Novitska.
2022 senesi qırımlı jurnalist ve aq qorçalayıcı İrına Daniıovıçnı FSB hadimleri alıp ketti. Daa soñra onı patlayıcı maddeler saqlağanında qabaatladılar, tahqiqat izolâtorında ise otit sebebinden uzun müddet tibbiy yardım kösterilmedi. Neticede faalniñ bir qulağı eşitmey, amma tedaviylenmey.
2024 senesi avgust ayında koloniyada bulunğan soñ Danılovıç qulaq ve baş ağrıları sebebinden tibbiy bölükke muracaat etti, amma ekim Lidiya Morozova, Danılovıç sağırlaşqan soñ, ağrı özü keçecek, dep ayttı. 2024 senesi avgustnıñ 1-nde faalniñ babası Bronıslav Danılovıç vefat etti.