Rusiye baş nazir muavini, Qırım «kuratorı» Marat Hunsullin, Azaq deñizi altından suv çıqarmaq içün quyular yaznıñ ortasında qazılacaq, dep bildirdi. Bunı o, Qırımğa ziyareti vaqtında jurnalistlerge ayttı.
«Şimdi geofizika ve keşfiyat işlerni yapqan eki gemi kirdi. Bellesem, iyül ayında quyularnı endi qazıp başlaycaqmız. Suvnı tapacağımızğa pek ümüt etemiz. Suv anda bar. Amma ne qadar, bu başqa sual. Bütün yarımadanı suvnen temin etmek içün yeterlimi, yoqmı?», – «Krıminform» Hunsullinniñ aytqanlarından alıntı ketire.
O, «tapılğan suvnıñ tehnikiy ihtiyaclar içün qullanıla bilecegini». bildire.
«Belde quyu açtıq. Daa yalı yanında suv taptıq. Suv bar. Keyfiyeti, tuzludır. Amma tehnikiy ihtiyacalar içün qullanıla bile», – dedi o.
Rusiye prezidenti Vladimir Putinniñ fikirince, Qırımda tatlı suv yete. Onıñ aytqanına köre, Qırımğa yaqın suvlarda, Azaq deñizi altında yedekler bar.
Azaq deñizinde tatlı suv yedeklerini tapmaq içün Rusiye 70 million rubley masraf etecek ola.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.