Avropa Birligi, Rusiyeniñ Aluştadaki «Hizb ut-Tahrir davası» boyunca dört qırımtatarına çıqarğan ükmüni qanunsız dep saya.
«Avropa Birligi, 4 qırımtatarına Rusiye arbiy mahkemesi tarafından çıqarılğan ükümni qanunsız ve qabul etilmez dep saya. Biz Rusiyeni qanunsız ilhaq etilgen Qırımda insan aqları saasında halqara standartlarğa ve halqara uquq vazifelerine tolusınen riayet etüvni temin etmesine çağıramız», – dep yazdı AB tış siyaset hızmetiniñ vekili Peter Stano Twitterde.
Ukraine: 🇪🇺 considers sentencing of 4 Crimean Tatars by 🇷🇺 Military Court illegal & unacceptable. We call on Russia to ensure full compliance with international human rights standards and other obligations under international law in the illegally annexed Crimea #CrimeaIsUkraine https://t.co/Y4f1eEojby
— Peter Stano (@ExtSpoxEU) August 18, 2021
Avgustnıñ 16-nda Rusiye mahkemesi qırımlılarnı üküm etti:
- Ruslan Mesutov – 18 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq;
- Lenur Halilov – 18 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq;
- Eldar Kantimirov – 12 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq;
- Ruslan Nagayev – 13 yıl sert rejimli koloniyada azatlıqtan marum etilecek, azat etilgen soñ azatlığı 1 yıl devamında sıñırlanacaq
Ukraina Tış işler nazirili Aluştadaki «Hizb ut-Tahrir davası» mabüsleriniñ ükmüne qarşı narazılıq bildirdi.
Büyük Britaniya Ukraina elçisi Melinda Simmons Rusiyeni Aluştadaki «Hizb ut-Tahrir davası» mabüslerini «acele azat etmesine» çağırdı.
ZMINA insan aqları merkezi, Vatandaş serbestlikleri merkezi ve «KrımSOS» Aluştadaki «Hizb ut-Tahrir davasınıñ» mabüslerine çıqarılğan ükümni takbih etti.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.