Rostov-na-Donudaki Rusiye Cenübiy okrugınıñ arbiy mahkemesi "Hizb ut-Tahrir" ile alâqaları bar olğanında qabaatlanğan Qırımlılar Nasiba Saidova, Esma Nimetullayeva, Fevziye Osmanova ve Elviza Aliyevanıñ apis cezasını qapalı rejimde 2027 senesi martnıñ 28-ne qadar uzattı. Bu aqta Qırımlı aq qorçalayıcı Lutfiye Zudiyeva Facebook saifesinde bildirdi.
Qadınlar oktâbrniñ 9-nda ilk oturışuvda Aqmescit SİZOsından video vastasınen iştirak etti. Mahkeme qararından soñ olarnı Aqmescitteki SİZO-1-den Rostov-na-Donudaki SİZO-1-ge etap etmek kerek ediler.
Nevbetteki mahkeme oturışuvı oktâbrniñ 23-ne belgilendi, amma Qırımlılar Rostov-na-Donuğa ketirilse olacaq, dep qoştı Zudiyeva.
2025 senesi orta küz ayınıñ 15-nde Rusiye quvetçileri Qırımda dört qırımtatar qadınını tutıp, olarnı Rusiye Ceza kodeksiniñ 205.5 maddesine istinaden (terror teşkilâtınıñ faaliyetinde iştirak etüv) "Hizb ut-Tahrir" davası boyunca qabaatladı.
Orta küz ayınıñ 16-nda Aqmescitteki Rusiye kontrolindeki Kiyev rayon mahkemesi dördüni de eki ayğa SİZO-ğa yolladı.
Qırımtatar resurs merkezi ve "Qırım birdemligi" yazğanlarına köre, qadınlar "terror teşkilâtınıñ" faaliyetini teşkil etkeninde ve akimiyetni zorbalıqnen zapt etmege azırlanğanında qabaatlana. Sentâbrniñ 5-nden olar malümatnı inceledi. Sentâbrniñ 8-nde apis cezası 2026 senesi oktâbrniñ 14-ne qadar uzatıldı.
Esma Nemetullayeva – Bağçasaray sakini, çağına yetmegen beş qıznıñ anası, 2023 senesi oşağan dava boyunca apiske alınğan Remzi Nemetullayevniñ ömür arqadaşı. Elviza Aliyeva – Topçıköy (Dolinnoye) köyünden student. Nasiba Saidova – imamnıñ qızı, Zalanköy (Holmovka) köyündeki bala bağçasınıñ ocası. Fevziye Osmanova Mamaşay (Orlovka) köyünde yaşay ve tükânda çalıştı.
Aq qorçalayıcılar "Hizb ut-Tahrir davaları" boyunca taqiplerni siyasiy sebepli dep saya: teşkilât Rusiyede yasaqlandı, amma Ukrayinada yasaq altında degil, qabaatlav toplaşuv ve diniy edebiyatqa esaslana, zorbalıq delilleri yoq.