Rusiye kontrolindeki Aqmescitniñ Kiyev rayon mahkemesi aprelniñ 12-nde «Hizb ut-Tahrir davasınıñ» mabüsleri Lenur Seydametov ve Timur Yalkabovnıñ sıñırlav tedbirini uzattı. Olar 2021 senesi iyülniñ 15-ne qadar apiste qalacaqlar, dep haber ete «Qırım birdemligi» birleşmesi.
Haberde aytılğanına köre, prokuror, mabüsler «azatlıqta cemaat nizamı içün telüke ola ve saqlanmağa tırışacaqlar», dep tüşüne. İmaye ise, dava mabüslerini tahqiqat izolâtorında tutmaq içün delil olmağanını israr etti.
«Mahkeme delillerimizni diñlep eşitmedi», – dedi advokat Refat Yunus.
Timur Yalkabovnıñ imayecisi Safiye Şabanovanıñ aytqanına köre, onıñ müvekkili mahkeme-psihiatrik ekspertizasından keçkeni içün mahkeme oturışuvında yoq edi.
«İmayeci, sıñırlav tedbirini uzatuv evelki qararına qarşı istinaf şikâyetini berdi, amma şikâyet öyle de baqılmadı, ve neticede apiste tutuv müddetine dair yañı qarar çıqarıldı», – dep aytıla «Qırım birdemliginiñ» haberinde.
Qayd etilgenine köre, Timur Yalkabovnıñ qız qardaşı astma ağırlaşqanından apishane şaraitlerinde sağlığı içün qasevetlene.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemliginiñ» faali Lutfiye Zudiyevanıñ aytqanına köre, tutulğanlar «Hizb ut-Tahrir» teşkilâtı ile alâqaları olğanından şübhelene ve Rusiye Ceza kodeksiniñ 205.5 maddesine istinaden qabaatlana.
Qırım Muhtar Cumhuriyeti ve Aqyar prokuraturası Qırımda keçirilgen kütleviy tintüvler sebebinden cinaiy tahqiqat başlatıldı, dep bildirdi.
Ukraina prezidentiniñ Qırım Muhtar Cumhuriyetindeki daimiy temsilciligi Rusiye quvetçileriniñ Qırımda musulmanlarnıñ (ekseriyeti qırımtatarı ola) evlerinde keçirgen tintüvleri aqqında malümat Ukraina uquq qoruyıcılarına berile ve «milliy ve halqara seviyedeki işte» qullanılacaq, dep bildire.
Ukraina Tış işler nazirligi Rusiye quvetçileriniñ fevralniñ 17-nde işğal etilgen Qırımda keçirgen tintüv ve tutuvlarğa qarşı narazılıq bildirdi. Müessise, halqara institutlarnı bu areketlerge qıymet kesmege çağırıp, soñki tutuv ve tintüvler aqqında malümatnı BM Baş Assambleyasınıñ sessiya baqıluvına çıqarmağa planlaştıra.
Ukraina Reintegratsiya nazirligi halqara toplulıqnı Qırımdaki tutuvlarğa cevap bermesine çağırdı.
«Hizb ut-Tahrir davası»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.