Vatandaş jurnalisti Ernes Ametov «Hizb ut-Tahrir» davasına istinaden 18 yıl ve 6 ayğa azatlıqtan marum etile bile. Bu talapnı Rostov-na-Donu Cenübiy okrugınıñ arbiy mahkemesi oturışuvında devlet qabaatlayıcısı seslendirdi, dep haber ete «Qırım birdemligi».
Prokuratura vekili Yevgeniy Kolpikovnıñ fikirince, bu müddetten ilk 5 yılnı Ametov apishanede keçirmeli, dep ayttı qabaatlayıcı, azat etilgen soñ ise 7 ay devamında sıñırlavlarğa riayet etmeli.
Sıñırlavlar Qırımnı terk etmege, açıq tedbirlerni teşkil etmege ve anda iştirak etmege, nezayert etken mahsus devlet organınıñ razılığı olmasa, yaşağan ve bulunğan yerini deñiştirmege yasaqlay. Bundan ğayrı, ayda 2 kere bu organğa qayd olmaq içün kelmeli.
Qabaatlayıcı qararda ses qaydları bar, anda Bağçasaray camilerinden birinde dava mabüsleri turmuş, siyasiy ve diniy mevzularnı muzakere ete.
Siyasiy mabüslernen bağlı qabaatlayıcı şaatlıq tek gizli şaatlardan alındı, olarnıñ aytqanları teşkermek imkânsız ola.
«Böyle bir vaziyette qalğan, qorqmağan, zayıflıqqa boysunmağan, qararını bergen insannı qorumaq menim içün büyük şeref ola. O, kerçek olmağan şeylerni aytmadı. Maqsat Ametovnı diger cinaiy davalarda kerekli şaatlıq bermege mecbur etmek edi. Yalan, şübheli, tam olmağan, amma tahqiqatqa kerek olğan şaatlıqlar. Ametovnıñ qafeste mabüs olaraq olmasınıñ sebebi böyle bir teklifke razı olmağanı ola», – dedi advokat Cemil Temişev munaqaşa vaqtında.
Ernes Ametov 2017 senesi oktâbrniñ 11-nde Seyran Saliyev, Marlen Asanov, Timur İbragimov, Server Zekiryayev ve Memet Belâlovnen beraber tintüvlerden soñ tutuldı. 3 yıl devam etken tahqiqat ve mahkemelerni qırımlı Qırım ve Rostov-na-Donu tahqiqat izolâtorlarında keçirdi.
2020 senesi onı aqlap, deliller yetmegeni içün mahkemede azat ettiler. «Hizb ut-Tahrir davasında» böyle bir vaqia em işğal etilgen Qırımda, em qomşu Rusiyede ilk oldı. Lâkin 2022 senesi mart ayında istinaf mahkemesi Cenübiy okrugınıñ arbiy mahkemesi çıqarğan qararnı yañıdan baqıp, davanı yañıdan baqılmasına yolladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.