Cuma künü, oktâbrniñ 29-nda, Rostov-na-Donuda qırımtatarlar Bağçasaraydaki «Hizb ut-Tahrir davasınıñ» mabüslerine üküm çıqarılacaq mahkeme ögünde toplaşa. Rusiye qabaatlavı dört kişi içün 66 yıl apis cezası berilmesini istedi.
İnsanlar yazuvlı şiarlarnen ve dava mabüsleriniñ fotosüretlerinen urbalarda tura, toplaşqanlar apiske alınğan qırımtatarlarnı azat etmege çağıra.
«Cenübiy okrugınıñ arbiy mahkemesi ögünde dava mabüsleriniñ üküm çıqarıluvına kelgen qırımtatarlar toplaşa. Tışarıda yol patrul hızmetiniñ maşinası ve polis maşinası nevbetçilik yapa. Diñleyiciler esnasqa kire bilmek içün muracaatlar yaza. Mabüslerniñ tuvğanları mahkeme binasına kire. Polis pandemiya sebebinden maska taquv rejimine riayet etmeli, dep tenbiley», – dep bildirdi Qırım.Aqiqatqa «Qırım birdemligi» birleşmesi.
Rostov-na-Donudaki Cenübiy okrugınıñ arbiy mahkemesinde bu davanıñ oturışuvı saat 10:00-ğa planlaştırıldı. Seytumer Seytumerov, Osman Seytumerov, Amet Suleymanov ve Rustem Seytmemetovğa üküm çıqarılması beklenile.
Oktâbrniñ 25-nde Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Your browser doesn’t support HTML5
«1944 senesi siyasetiniñ devamıdır». Bir qorantadan üç kişiniñ aynı künde apiske alınması
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.