"Hizb ut-Tahrir" davaları boyunca mahküm etilgen üç Qırımtatar Rusiyeniñ Arhangelsk vilâyetindeki İks qasabasındaki 21-nci TC koloniyasından çıqarıldı. Bu aqta "Qırım birdemligi" haber ete.
Mahküm etilgen Qırımtatarlar 32 yaşındaki Raim Ayvazov ve 62 yaşındaki Ruslan Nagayev Arhangelsk vilâyetiniñ Kotlas şeeriniñ 4-nci SİZO-sına avuştırıldı. Bu aqta "Qırım birdemligi"ne mabüsniñ ömür arqadaşı Mavile Ayvazova bildirdi. Onıñ aytqanına köre, etap etüv koloniyalarda yerlerniñ yañıdan bölüvi ile bağlı.
"Quralaynıñ 30-nda olarnı koloniyadan çıqardılar, 31-inde ise o "Zonatelekom"dan telefon etip, kelgenini bildirdi", — dep tarif etti Mavile Ayvazova.
Raim Ayvazov — "Qırım birdemligi"niñ faali, "Hizb ut-Tahrir davası" boyunca "Ekinci Aqmescit gruppasınıñ" mabüsi. 2022 senesi Sabannıñ 10-nda Rostov-na-Donu şeerindeki Cenübiy okrugınıñ arbiy mahkemesi onı 17 yılğa azatlıqtan marum etti. 2023 senesi Sabannıñ 28-nde İstinaf arbiy mahkemesi ükümni amelde qaldırdı.
Raim Ayvazov
Ruslan Nagayev — "Hizb ut-Tahrir" davası boyunca Aluşta gruppasınıñ figurantı. 2019 senesi Aluştada keçirilgen tintüvlerden soñ tutulğan edi. Daa soñra İstinaf arbiy mahkemesi ükümni deñiştirmedi.
Tahqiqatnıñ versiyasına köre, Raim Ayvazov ve Ruslan Nagayev Rusiyede ve işğal etilgen Qırım akimiyeti tarafından terroristik teşkilât olaraq tanılğan "Hizb ut-Tahrir" islâm siyasiy firqasınen bağlı ediler. Aynı zamanda, cinaiy dava malümatına köre, olarda silâ, patlayıcı ve silâ yedekleri tapılmadı, terroristik areketlerniñ azırlanuvı da deñişmedi.
Ruslan Nagayev
Bundan da ğayrı, 12 yılğa mahküm etilgen Aqmescitli faal Vladlen Abdülkadırov Quralaynıñ 15-nde Aqmescit hastahanesine alındı. Onıñ vaziyeti daa evel diagnoz qoyulğan omür arqası belkemik arası quyuldığı ve omurğasınıñ deñişmesinden sebep fenalaştı. Bunı "Qırım birdemligi"ne onıñ ömür arqadaşı Gülzar Abdülkadırova bildirdi.
Onıñ aytqanına köre, aqayı 2023 senesinden berli, Lipetsk vilâyetiniñ Yelts şeerindeki 2-nci apishanege ketirilgeninden berli, bel ağrısını çeke. Daa soñra sağ ayağında ağrılar ve sol qolunıñ eki parmağı duyulmay başladı.
"Bazıda kötekley, bazıda ise çoq turıp olamay, çoq otura, çoq uzana. Demek ki, o, daima mevamını deñiştirmek kerek. Elniñ parmaqları duyğusızlaşqanı, ğaliba, boyun bölüginiñ yırtığı ile bağlıdır. Amma bu daa bir kere tek tahminimizdir", — dep ayttı Gülzar Abdülkadırova.
Vladlen Abdülkadırov
Hastahanede oña bir qaç kün devamında iyneler yapıldı, soñra qan basımı 180-ge qadar köterildi. İlâclar yardımınen qan basımını eksiltmege ve stabilleştirmege imkân oldı.
Şimdiki vaqıtta Abdülkadırov miyorelaksantlar ve ağrı kesici ilâclarnı ala. Amma, onıñ aytqanına köre, olar az yardım ete. Rentgen, omurğasınıñ vaziyetini tam olaraq qıymet kesmege imkân bermedi.
"MRT teşkerüvi beklenile. Amma anda cihazları bozulğan. Onıñ içün onı tamir etip, MRT yapılmasını bekleyler," — dep bildirdi ömür arqadaşı.
Bundan da ğayrı, qırımtatarnı mide-içek organları ile problemler raatsızlay.
"O ne içse de, atta suv içse de, ögüne egilgende, meselâ namaz vaqtında, hoş olmağan duyğular peyda ola. Şimdi aştan evel aşqazan ağrılarını azlaştırmaq ve alını yahşı etmek içün ilâc içe", — dedi Gülzar Abdülkadırova.
Vladlen Abdülkadırov — Aqmescit rayonından çoq balalı baba ve cemaat faali. 2022 senesi oña 12 yıl apis cezası berildi. Cezasınıñ ilk beş yılını apishanede keçirmek kerek.