UNESCO telükede olğan dünya mirasınıñ obyektleri cedvelini kenişletmege azırlana. Arbiy areketler ve iklim deñişmelerinden zarar körgen obyektler bu cedvelge kire bile. İşğal etilgen Qırımdaki vaziyetke ayrı diqqat etile, dep bildire France 24.
Pusanda (Cenübiy Koreya) Dünya mirası komitetiniñ sessiyasında bir qaç obyektniñ "qırmızı cedvelge" kirsetilüvini muzakere etmege planlaştırıla. Olarnıñ arasında – 2014 senesi Rusiye işğal etken Aqyardaki Hersones Tavriçeskiy antik yunan yerleşmesidir.
Ukrayina abide qanunsız qazılma işleri, büyük qurucılıq ve Rusiyeniñ büyük istilâsı başlağanınen artefaktlarnıñ başqa yerge alınmasından telüke altında buluna, dep bildire. Rusiye akimiyeti bu yerni faal sürette arbiy maqsadlarda qullana ve şübheli "rekonstruktsiya" yapa, bular obyektniñ özgünligini yoq ete.
UNESCO Dünya mirası merkeziniñ müdiri Lazar Elundu Assomo "telükede" cedveline kirsetilmesi ceza degil, obyektlerniñ saqlap qalması içün maliye ve diqqat celp etecek bir alet ola, dep qayd etti.
Ukrayina içün Hersonesniñ "qırmızı cedvelge" kirsetilüvi işğal etilgen topraqlarda Rusiye yıqıcı siyasetiniñ daa bir halqara isbatı olacaq. 2017 senesi UNESCOdan çıqqan, amma komitet azası olaraq qalğan Rusiye medeniy mirasqa zarar ketirgenini inkâr ete.
Bundan ğayrı, cedvelge telükede olğan diger obyektler de kirdi.
- Rusiyedeki Baykal gölü – kirlenüv, kütleviy turizm, orman kesilüvi ve suv seviyesi eksilgeni içün.
- Urdunnıñ Ğarbiy yalısında Sevastiya arheologik abidesi.
- Lübnan cenübinde beş isar, hususan İsrail ordusı zapt etken Bofor qalesi.
- Cenübiy Sudanda Boma-Badingilo – cenkten ve iklim deñişmelerinden zarar körgen millionlarnen antilopanıñ köç yolu.