Hersonda rus dronu mikroavtobusqa ücüm etti, yedi adam yaralandı, dep haber ete şeerniñ arbiy idaresiniñ başı Yaroslav Şanko.
"Duşman askerleri kene sivil naqliyatqa darbe endirdiler. Bu, şeerniñ merkezinde saba saat 11:15 yaqınlarında Herson şeer şurasınıñ münisipal müessisesine ait olğan mikroavtobus edi", — dep yazdı o Telegramda.
İlk malümatqa köre, altı yolcu yaralanğanı ve aydavcı kontuziyağa oğrağanı belli.
Hersonda cemaat naqliyeti toqtamadan rus ücümlerine oğray.
Yerli akimiyetniñ malümatına köre, Quralaynıñ 13-ü sabası Hersonda rus ücümlerinde eñ azdan yedi adam yaralandı.
Rusiye arbiyleri Ukrayina regionlarına çeşit silâ qullanıp muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.