Rusiye kontrolindeki Qırım yolbaşçısı Sergey Aksenov derc etken buyruqqa köre, Qırım ve Herson vilâyetiniñ işğal etilgen qısmı arasında kiriş ve çıqışta «hususiy rejim» kirsetile.
Fermanğa köre, Qırım şimalinde keçiş rejimi «Rusiye Federatsiyasınıñ devlet sıñırından keçiş rejiminen aynı» ola. Qırım ve Herson vilâyeti arasında memuriy sıñırından keçüv yerleri olaraq «Armânsk», «Perekop», «Canköy» maşina keçiş noqtaları, «Armânsk» ve «Canköy» demiryol keçiş noqataları belgilendi.
«Qırım Cumhuriye ve Herson vilâyeti arasında memuriy sıñırnı keçüv bu alda kerçekleştirilecek: çetel vatandaşlarınıñ ya da vatandaşlıqsız şahıslarnıñ şahsiyetini köstergen ve halqara añlaşmalarğa köre Rusiye Federatsiyası tarafından tanılğan vesiqası olacaq», – dep aytıla buyruqta.
Bundan ğayrı, vesiqağa köre, Rusiye arbiy kolonnaları Rusiye FSBsiniñ sıñır idaresinden tasdıq alıp, ayrı yollardan areket etecek.
Ukrayınanıñ Herson vilâyetiniñ bir qısmı 2022 senesi Rusiyeniñ büyük istilâsı başlağanından berli işğal altında qala. Ukrayına Silâlı quvetleri 2022 senesi oktâbr-noyabr aylarında Herson vilâyetiniñ sağ tarafını vilâyet merkezinen beraber azat etti. Vilâyetniñ sol tarafı işğalde qala.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.