Rusiye ordusı Hersonnıñ merkeziy qısmına kene ateş açtı, elâk olğanlar bar, dep bildirdi vilâyetniñ arbiy memuriyet yolbaşçısı Oleksandr Prokudin Telegramda.
Onıñ aytqanına köre, bir esli-başlı qadın sağ qalmasına imkân bermegen yaralar aldı ve bir er adam can berdi.
Yerli akimiyetniñ malümatına köre, keçken künü Herson vilâyetiniñ 43 mesken yeri, şu cümleden Herson Rusiye ücümlerine oğradı, 16 insan yaralandı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.