Rusiye ordusı kündüz Hersonda marşrut avtobusına uçucısıznen ücüm etti, sekiz kişi yaralandı, dep bildirdi şeerniñ arbiy memuriyet reisi Yaroslav Şanko.
Onıñ aytqanına köre, bu şeerniñ Dniprovskıy rayonında saat 11.50-lerde oldı.
"15 yaşında gençniñ patlav yarası bar, qaburğa, omuz ve betinde parça yaraları bar. Onı orta ağır alda hastahanege aldılar. 58 yaşında er adam ve 37 yaşında qadın patlav ve parça yaralarını aldı. 53 yaşında er adam ve 54 yaşında qadın mayın-patlayıcı yara aldı ve kontuziya oldı", – dep yazdı o, Telegramda.
Haber etilgenineye köre, Rusiye droları Herson vilâyetinde marşrut avtobuslarına muntazam sürette ücüm ete.
Rusiye dronınıñ Hersonda sebze satqan erkekke qarşı ücümini izaatlağan Ukrayina prezidenti Volodımır Zelenskıy bu ücümlerni vatandaşlarğa qarşı "safari" dep adlandırdı. O, dünyanı bu cinayetlerge diqqat ayırmağa ve Rusiyege qarşı basqını quvetleştirmege çağırdı.
BM insan aqları monitoring missiyası böyle dronlarnıñ Ukrayinada vatandaşlarğa qarşı ücümlerini qayd etti.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.